பாதுகாப்பற்ற தங்கும் விடுதியிலிருந்து கீழே விழுந்து பலியான யுவதி: இறால் கழிவு வீசச்சென்ற போது விபரீதம்

பாதுகாப்பற்ற தங்கும் விடுதியிலிருந்து கீழே விழுந்து பலியான யுவதி: இறால் கழிவு வீசச்சென்ற போது விபரீதம்!

பாதி கட்டி முடிக்கப்பட்ட இரண்டு மாடி வீட்டின் மேல் தளத்தின் பாதுகாப்பற்ற பகுதியிலிருந்து இளம் பட்டதாரி யுவதி ஒருவர் கீழே விழுந்து உயிரிழந்துள்ளதாக தலங்கம பொலிஸார் தெரிவிக்கின்றனர்.

உள்நாட்டு இறைவரி திணைக்களத்தில் முகாமைத்துவ உதவியாளராக கடமையாற்றிய நிவித்திகல, கல்லகே மண்டிய பிரதேசத்தை சேர்ந்த ஹன்சனி பாக்யா ஜயதிலக்க என்ற 30 வயதுடைய யுவதியே விபத்தில் உயிரிழந்துள்ளார்.

உயிரிழந்த யுவதி மேலும் மூன்று யுவதிகளுடன் சம்பத் பிளேஸ், பத்தரமுல்லை பிரதான வீதியிலுள்ள இரண்டு மாடி வீட்டின் மேல் பகுதியில் தற்காலிகமாகத் தங்கியிருப்பதுடன், கடந்த வெள்ளிக்கிழமை (11) மாலை 6.40 மணியளவில் வேலை முடிந்து வந்துள்ளதாக பொலிஸாரின் விசாரணையில் தெரியவந்துள்ளது.

அவருடன் அறையில் வசிக்கும் நிலப் பதிவாளர் அலுவலகத்தைச் சேர்ந்த தோழியும் வேலை முடிந்து வந்திருந்தார். உயிரிழந்த யுவதி, தனது தோழியை அழைத்து, இரவு உணவிற்கு கொண்டு வந்த இறாலை தயார் செய்வதாகக் கூறினார்.

இதற்கிடையில், தோழி குளியலறைக்கு சென்று உடலை கழுவி சுத்தம் செய்து கொண்டிருந்தார். அப்போது  ஏதோ விழும் சத்தத்துடன், தோழியின் அலறல் சத்தத்தையும் கேட்டார். வெளியே வந்து பார்த்த போது, வீட்டின் பின் கதவில் இருந்து மேல் தளத்தில் இருந்து ஒருவர் கீழே விழுந்திருந்ததை பார்த்து, ​​வீட்டின் உரிமையாளர்களிடம் கூறியுள்ளார்.

கீழே விழுந்த யுவதி இரண்டு மாடி வீட்டின் முதல் தளத்தின் பின்புறத்தில் வைக்கப்பட்டிருந்த பிளாஸ்டிக் கேனில் முகம் குப்புறக் கிடந்தார், மேலும் அவரது இடது காது மற்றும் மூக்கில் இருந்து இரத்தம் வழிந்திருந்ததை கண்டதாகவும் பொலிசாரிடம் தெரிவித்தனர்.

இறந்த யுவதி சுத்தம் செய்த இறால்களின் அப்புறப்படுத்தப்பட்ட பாகங்கள் அடங்கிய பையும் அங்கேயே கிடந்ததாக போலீசார் கூறுகின்றனர்.

படுகாயமடைந்த யுவதிறுயை வீட்டின் உரிமையாளரின் மருமகன் அருகில் உள்ள வீட்டின் முன் அழைத்துச் சென்று 1990 சுவசார்யா அம்புலன்ஸ் மூலம் கொழும்பு தேசிய வைத்தியசாலையில் அனுமதித்துள்ளதாக பொலிஸார் மேலும் தெரிவித்தனர்.

சுத்திகரிக்கப்பட்ட இறால் எச்சங்களை மேல் தளத்தின் பின்பகுதியில் உள்ள கொள்கலனில் வைக்கச் சென்ற போது உயிரிழந்த யுவதி மேல் மாடியில் இருந்து தவறி விழுந்திருக்கலாம் என சந்தேகிக்கப்படுவதாக பொலிஸார் தெரிவித்தனர்.

தகவலின்படி, உயிரிழந்த யுவதி முன்னர் காணி பதிவாளர் அலுவலகத்தில் பணிபுரிந்ததாகவும், சுமார் இரண்டு வருடங்களுக்கு முன்னர் உள்நாட்டு இறைவரி திணைக்களத்தில் பணிபுரிய ஆரம்பித்ததாகவும் தெரிவிக்கப்பட்டுள்ளது.

கொழும்பு தேசிய வைத்தியசாலையில் பிரேத பரிசோதனையின் பின்னர் சடலம் உறவினர்களிடம் ஒப்படைக்கப்பட்டது.

இந்த துரதிஷ்டவசமான மரணத்தை ஒரு பாடமாக எடுத்துக் கொண்டால், தங்கும் விடுதி வழங்குனர்களின் பொறுப்பற்ற நடவடிக்கையால் ஒரு உயிர் இழக்கப்பட்டுள்ளது. பாதுகாப்பற்ற தங்கும் விடுதிகள் தொடர்பில் அனைவரும் பொறுப்புடன் நடக்கும் அதேவேளையில், உத்தியோகத்தர்களம் இந்த விடயத்தில் கவனம் செலுத்த வேண்டும்.